20 ფილმი, რომელიც ოქტომბერში აუცილებლად უნდა ნახო

nugo July 10, 2021

წლევანდელი ზაფხული ცნობილი კინოკომპანიებისთვის არც ისეთი კარგი აღმოჩნდა, როგორც თრეილერებმა დაგვაიმედა. არაერთი ფილმი მოექცა კრიტიკის ქარცეცხლში და გაყიდვების ბიუჯეტმაც მოლოდინები უმეტესწილად ვერ გაამართლა. მიუხედავად ამისა, წლევანდელი კინოს სეზონი ჯერ კიდევ შეიძლება შთამბეჭდავად დაგვამახსოვრდეს, რადგან შემოდგომა რამდენიმე ძალიან სერიოზული და იმედისმომცემი ნამუშევრის პრემიერას გვპირდება. დიდბიუჯეტიანი ბლოკბასტერებითა და ოსკარის ნომინანტი ფილმებით სავსე წლის დასასრულს, ოქტომბერში სანახავი საუკეთესო სურათების სიას გთავაზობთ:

 

1.  Blade Runner 2049

წლის ერთ-ერთი ყველაზე მნიშვნელოვან პრემიერაზე წასვლის მიზეზად რაიან გოსლინგის და ჰარისონ ფორდის შეუდარებელი დუეტის ნახვაც კი საკმარისია, თუმცა ეს ფილმი კიდევ რამდენიმე შთამბეჭდავ ნიუანსს გვთავაზობს. უკვე 35 წელი გავიდა მას შემდეგ, რაც რიდლი სკოტმა მსოფლიოს საოცარი სამყარო გააცნო კინოეკრანებიდან, ამჯერად კი ორიგინალურ სიუჟეტს ოსკარის ნომინანტი რეჟისორი დენი ვილნევი შემოგვთავაზებს. ფილმში სამსახიობო გუნდს ჯარედ ლეტო და რობინ რაიტიც შეუერთდნენ, რაც მართლაც საოსკარე დონის განწყობას შეგიქმნით. გოსლინგის თქმით, ფილმის გადასაღებ მოედანზე თითოეული დეტალი ძალიან ლამაზი და საოცრად ორიგინალური იყო, ხოლო ნამუშევრის აუდიოგაფორმება სრულიად ახალ დონეზეა აყვანილი.

ფილმის პრემიერა 6 ოქტომბერსაა დაგეგმილი.

2. The Mountain Between Us 

გენიალური რეჟისორის გადაღებული რომანტიული დრამა ყველა სეზონს უხდება, თუმცა ამჯერად წინ განსაკუთრებული სიამოვნება გელით. ქეით უინსლეტის და იდრის ელბას წყვილი თოვლით და მწვერვალებით გარშემორტყმულ სამყაროში მიემართება, თან კი ყველაზე საყვარელი ძაღლი ახლავთ. გაყინვის პირას მყოფი წყვილი შთამბეჭდავ პერფორმანსს გვთავაზობს, თუმცა კრიტიკოსების აზრით ეს ფილმი იდრის ელბას საუკეთესო ნამუშევრადაც შეიძლება ჩაითვალოს.

პრემიერის თარიღი: 6 ოქტომბერი.

3. The Florida Project

შონ ბეიკერმა რეჟისორული ტალანტით კიდევ ერთხელ მოახერხა კინოსამყაროს მოხიბლვა. 2017 წლის კანის კინოფესტივალზე წარდგენის შემდეგ არ წყდება ლაპარაკი იმაზე, რომ უილემ დეფოს თამაში აუცილებლად იმსახურებს ოსკარს. ცნობილი ვარსკვლავის პერსონაჟი ემოციურად დატვირთული ფილმში ერთი რიგითი მენეჯერია, რომელსაც მის სასტუმროში მცხოვრები ადამიანების ცხოვრებაში უწევს ჩარევა. როდესაც ღარიბი დედა შვილის ცხოვრებას საფრთხეს უქმნის, პატარა გოგონას ცხოვრების გამოსწორებაზე ზრუნვა სწორედ უილიამ დეფოს პერსონაჟს უწევს. ასეთი დრამატული სცენარი მართლაც არავის დატოვებს გულგრილს.

ფილმის პრემიერა 6 ოქტომბერს შედგება.

4. Una

ერთ-ერთი ყველაზე პოპულარული თეატრალური დადგმა დიდ ეკრანებზე ინაცვლებს. რუნის მარა მისი კარიერის ყველაზე რთულ გამოწვევას დაუპირისპირდა და თქვენს წინაშე ყველაზე სერიოზული როლით წარსდგება. მისი პერსონაჟი მამაკაცს ხვდება, რომელთანაც 13 წლის ასაკში სექსუალური ურთიერთობა ჰქონდა. დრამის ეპიცენტრში მყოფი გოგონა მის ყოფილ პარტნიორს მიტოვებასა და აუხსნელად გაუჩინარებაში სდებს ბრალს და საპასუხოდ ახსნა-განმარტებას ითხოვს.

ფილმის პრემიერა 6 ოქტომბერს შედგება.

5. The Meyerowitz Stories 

პრესტიჟული კომედია არამარტო ბევრს სიცილს, არამედ ადამ სანდლერის საუკეთესო როლსაც შემოგვთავაზებს. მაისში კანის ფესტივალზე გამართული ჩვენების შემდეგ, კრიტიკოსებმა ერთხმად აღიარეს, რომ მსგავსი დონის შესრულება ცნობილი მსახიობისგან არცერთ ფილმში არ უნახავთ. ამასთან ერთად, ახალი ნამუშევარი ბენ სტილერის და დასტინ ჰოფმანის შეუდარებელ პერსონაჟებსაც წარმოგვიდგენს, რომლებსაც საერთო ოჯახური პრობლემები აერთიანებთ. კომედიის მოყვარულთათის ეს ფილმი წლის მთავარ მოვლენად შეიძლება ჩაითვალოს.

სურათის პრემიერა 13 ოქტომბერსაა დაგეგმილი.

6. The Foreigner

ყველასთვის ცნობილი ჯეკი ჩანი ისევ ფორმაშია. ახალ ფილმში თავგადასავლებითა და მძაფრი სიუჟეტით გადაღებული ფილმი ცნობილ ვარსკვლავს მისთვის კარგად ნაცნობ სიტუაციაში წარმოგვიდგენს. ჯეკი ჩანს ისევ სიკეთის მხარეს უწევს ბრძოლა, რათა მისმა პერსონაჟმა საკუთარი ქალიშვილის მკვლელის პოვნა მოახერხოს. პოლიტიკური თემებითა და პირს ბროსნანის მაღალი კლასის შესრულებით გაჯერებული ნამუშევარი მართლაც იდეალურია დროის გასაყვანად.

პრემიერის თარიღი: 13 ოქტომბერი.

7. Happy Death Day

თუ ჯეკი ჩანის და ადამ სანდლერის ახალი ფილმები ვარსკვლავური სამსახიობო ჯგუფით იწონებენ თავს, ეს ფილმი კომედიური ჟანრის ერთ-ერთ ყველაზე იდეალურ სცენარს შემოგთავაზებთ. ფილმის მთავარ გმირს საკუთარი გარდაცვალების დღის თავიდან ცხოვრება უწევს მანამდე, სანამ არ ამოიცნობს ვინ არის მისი მკვლელი.

პრემიერის თარიღი 13 ოქტომბერია.

8. Marshall

ემის ჯილდოს მფლობელი სტერლინგ ბრაუნის და ქეით ჰადსონის ახალი ფილმი ამერიკის მთავრობის ყველაზე მნიშვნელოვან ისტორიას მოგვითხრობს. დაძაბული სიუჟეტის მქონე ბიოგრაფიული დრამა ცნობილი მოსამართლის ცხოვრების სხვადასხვა რთულ პერიოდს გვანახებს, სადაც მას საკუთარი კანის ფერის გამო კარიერულ გზაზე სერიოზული წინააღმდეგობები ხვდებოდა.

ფილმის მსოფლიო პრემიერა 13 ოქტომბერსაა დაგეგმილი.

9. Professor Marston and the Wonder Women

2017 წელი დიდ ეკრანებზე ქალი-საოცრების ეპატაჟური დაბრუნების პერიოდად იქცა. ეს ფილმი სწორედ ამ ცნობილი პერსონაჟის შემქნელისა და ლეგენდარული ფსიქიატრის უილიამ მარსტონის ცხოვრებას წარმოგვიდგენს. ბიოგრაფიული ფილმი ცნობილი გამომგონებლის ცხოვრებაში მისი ცოლისა და საყვარლის ურთიერთობაზე მოგვითხრობს. აღსანიშნავია, რომ სწორედ ამ ამბავს მიიჩნევენ ქალი-საოცრების შექმნის მიზეზად.

პრემიერის თარიღი 13 ოქტომბერია.

10. Breathe

ენდრიუ გარფილდი საზოგადოების წინაშე კიდევ ერთი ოსკარის დონის ნამუშევრით წარსდგება. ცნობილი ვარსკვლავის ახალი ფილმი ბიოგრაფიულია და უნარშეზღუდული პირების უფლებების დამცველის ცხოვრებაზე მოგვითხრობს. ენდრიუ გარფილდის პერსონაჟს თვითონაც რთული დაავადება შეიპყრობს და ახალგაზრდულ წლებს მასთან ბრძოლაში ატარებს, რაც ფილმში საკმაოდ საინტერესოდ და ემოციურად არის გადმოცემული. ემოციური ნამუშევარი აუცილებლად მოგანდომებთ მისი პერსონაჟების ცხოვრებაში ჩაბმას.

პრემიერის თარიღი: 13 ოქტომბერი.

11. Goodbye Christopher Robin

ყველასთვის უსაყვარლესი “ვინი პუჰის” ავტორის, არტურ მილნის ამ მშვენიერ ბიოგრაფიულ ფილმში (მთავარ როლებში: მარგო რობი და კელი მაკდონალდი) მწერლის (დომნალ გლისონი) ცხოვრების მნიშვნელოვანი და გადამწყვეტი ეპიზოდია მოთხრობილი — თუ როგორ შთააგონებს მძიმე დროებაში მას თავისი ვაჟი ყველა დროის ერთ-ერთი უპოპულარულესი და საყვარელი პერსონაჟის, ვინი პუჰისა და მისი სამყაროს შექმნას.

ფილმის პრემიერა 20 ოქტომბერს იგეგმება.

12. Same Kind of Different as Me

საერთაშორისო არტ დილერი, რომლის როლსაც გრეგ კინერი ასრულებს, იძულებულია, კეთილგანწყობილი იყოს მაწანწალასთან, რათა იხსნას ქორწინება ქალთან (რენე ზელვეგერი), რომლის ამბიციები ამ უცნაური სამეულის ცხოვრებას სრულიად ცვლის.

ფილმის პრემიერის თარიღი: 20 ოქტომბერი

13. The Snowman

ჯო ნესბოს ამავე სახელწოდების ძალიან საინტერესო და დაძაბული რომანის ადაპტაცია, ყინულოვანი თრილერი მაიკლ ფასბენდერით მთავარ როლში, რომელიც გამომძიებელს თამაშობს. ის ზამთრის პირველი თოვლისას გაუჩინარებული მსხვერპლების საიდუმლოს იძიებს და სერიულ მკვლელს უდგება კვალში.

პრემიერის თარიღი: 20 ოქტომბერი

 14. BPM (Beats Per Minute)

რობინ კამპილოს დრამა გვიამბობს 90-იანების პარიზში გაბატონებული AIDS ეპიდემიის მოვლენებზე და აქტივისტების ჯგუფზე სახელად ACT UP, რომლებიც იბრძვიან, რათა სამედიცინო დახმარების მიღება ყველამ მიიღოს. ფილმის პრემიერა კანის კინოფესტივალზე შედგა და დიდი მოწონებაც დაიმსახურა კრიტიკოსებს შორის.

ფილმის მსოფლიო პრემიერა 20 ოქტომბერს შედგება.

15. The Killing of a Sacred Deer

ნიკოლ კიდმანი, კოლინ ფარელი და ალისია სილვერსტოუნი იორგოს ლანთმოსის ფილმში… ცხადია, ამ ფილმისგან ბევრს ელიან. ბერძნული ტრაგედიის ელფერებით დამუხტული დრამა ერთი ოჯახის მეტად დაძაბულ, სულისშემძვრელ ურთიერთობას გვიხატავს.

გამოსვლის თარიღი: 20 ოქტომბერი

16. Wonderstruck

ცნობილი ტოდ ჰაინესის შესანიშნავი ფილმის სიუჟეტი რამდენიმე დროში ვითარდება, მთავარი გმირები კი არიან 1927 წელს მცხოვრები ახალგაზრდა როზი, რომელიც თავისი კერპის (ჯულიანა მური) ყურადღების მიპყრობას ცდილობს და ბიჭი, რომელიც 1977 წლის ნიუ-იორკში მამას დაეძებს.

პრემიერის თარიღი: 20 ოქტომბერი

17. All I See Is You

ამ ფილმში ბლეიკ ლაივლი უსინათლო ქალის როლს ასრულებს, რომელიც მხედველობის დაბრუნებას ახერხებს და საკუთარი ცხოვრებისა და ოჯახის უხერხული საიდუმლოებების ცხადად დანახვა შეუძლია. რეჟისორი მარკ ფორსტერია.

ფილმის პრემიერა 27 ოქტომბერს შედგება.

18. Jigsaw

ფრენჩაიზი ხერხი წლების შემდეგ ახლებური სახით უბრუნდება მაყურებელს. სახელგანთქმული სერიული მკვლელის სიკვდილიდან 10 წლის შემდეგ ახალი ქილერი გამოდის ასპარეზზე, რომელიც ჯიგსოუს წარსული დანაშაულებით ინსპირირებული ხოცავს მსხვერპლს.

პრემიერის თარიღი: 27 ოქტომბერი

19. Novitiate

მეგი ბეტსის ახალი დრამის მოქმედება 1960-იანი წლების კათოლიკურ ეკლესიაში, მონაზვნობის მსურველი ახალგაზრდა, თამამი იდეების მქონე ქალის ცხოვრების გარშემო ვითარდება.

ფილმი 27 ოქტომბერს გამოდის.

20. The Square

დაბოლოს, ოქტომბერში არ უნდა გამოგრჩეთ რუბენ ოსტლუნდის ოქროს პალმის რტოს მფლობელი ფილმი ექსცენტრულ ადამიანზე, რომელსაც თანამედროვე ადამიანური ყოფის სატირა შეიძლება ვუწოდოთ.

ამ ფილმის მსფოლიო პრემიერაც 27 ოქტომბერსაა დაგეგმილი.