2017 წლის 5 მინი-სერიალი, რომელიც წიგნის ეკრანიზაციას წარმოადგენს

nugo ივლისი 10, 2021

 

ამბობენ, რომ წიგნი ყოველთვის სჯობს მის ეკრანიზაციას, იქნება ეს ფილმი თუ სერიალი. თუმცა, ბოლო პერიოდში გადაღებულმა მინი-სერიალებმა, რომლებიც გახმაურებულ რომანებს ეფუძნება, ეს მოსაზრება ეჭვქვეშ დააყენა და ამის მაგალითად თუნდაც მხევლის წიგნი გამოდგება. ქვემოთ ჩამოთვლილია 5 მინი-სერიალი, რომელიც 2017 წელს გამოვიდა და წიგნის ეკრანიზაცის წარმოადგენს.

1.მხევლის წიგნი – კანადელი მწერლისა და ბუკერის პრემიის ლაურეატის, მარგარეტ ეტვუდის ამავე სახელწოდების რომანს ეფუძნება. სერიალი 2017 წელს დაიწყო. მისი შემქმნელი ბრუს მილერია, ხოლო მთავარ როლს ბოლო პერიოდის ერთ-ერთი ყველაზე პოპულარული მსახიობი ელიზაბეტ მოსი ასრულებს.

მხევლის წიგნი მომავლის საზოგადოებას აღწერს, სადაც ადამიანები კასტებად იყოფიან და მკაცრად განსაზღვრულ წესებს ემორჩილებიან. ამ მკაცრად განსაზღვრულ სისტემაში კი ერთ-ერთ კასტას მხევლები წარმოადგენენ. მხევლებს არანაირი უფლება არ გააჩნიათ – არც სიყვარულის, არც დაოჯახების, არც მუშაობის ან საკუთრების ქონის. მათ მეთაურთა უნაყოფო ოჯახებში ანაწილებენ და აკისრებენ ერთადერთ ფუნქციას – მეთაურს შვილი გაუჩინონ. მხევალთა რეალობა სასტიკია, რაც რეჟისორისა და ოპერატორის წყალობით, ბრწყინვალედაა გადმოცემული. სულისშემძვრელი კადრები და სცენები ვერცერთ მაყურებელს გულგრილს ვერ დატოვებს.

2.ამერიკელი ღმერთებინილ გეიმანის რომანის ეკრანიზაცია, რომელსაც მისი ფანები თექვსმეტ წელს ელოდნენ. სერიალი წელს გამოვიდა და მისი შემქმნელები ბრაიან ფულერი და მაიკლ გრინი არიან. მოქმედება თანამედროვე ამერიკაში ხდება. მთავარი გმირი – შედოუ (რიკი ვიტლი) თვითმფრინავში შემთხვევით გაიცნობს ადამიანს, რომელიც ეტყვის, რომ მალე საშინელი შტორმი დაიწყება და დედამიწაზე ყველაფერი შეიცვლება. მართლაც, სერიალში თქვენ ნახავთ საოცარ სამყაროს, რომელიც ჯადოსნური საგნებითა და არსებებითაა სავსე.

3.უიღბლო შემთხვევების სერიაNETFLIX-ის ახალი სერიალი, რომელიც ამერიკელი მწერლის, ლემონი სნიკეტის საბავშვო წიგნებს ეფუძნება. სიუჟეტი ბოდლერების ოჯახის გარშემო ვითარდება. საშინელი ხანძრის შემდეგ დაობლებულ ბავშვებზე პასუხისმგებლობას გრაფი ოლაფი იღებს, რომელსაც სინამდვილეში ქონების მითვისება სურს და პატარების მოკვლა აქვს ჩაფიქრებული. თუმცა ბოდლერების ოჯახი ბევრ საიდუმლოს ინახავს… საინტერესო სიუჟეტისა და საოცარი კადრების წყალობით, სერიალი გამოსვლისთანავე პოპულარული გახდა. ამას ემატება ისიც, რომ მთავარ როლს ყველასთვის საყვარელი მსახიობი, ნეილ პატრიკ ჰარისი ასრულებს.

4.13 მიზეზი – ასევე NETFLIX-ის ახალი სერიალი, რომელიც ამერიკელი მწერლის, ჯეი აშერის 2007 წლის რომანს ეფუძნება. თინეიჯერი კლეი ჯენსენი სახლის კართან პოულობს ყუთს, რომელიც წერილებითაა სავსე. წერილები ეკუთვნის ჰანა ბეიკერს, გოგონას, რომელიც კლეის უყვარდა და რომელმაც თავი მოიკლა. ჰანას წერილების წყალობით, ჩვენ ვიგებთ 13 მიზეზს, თუ რატომ შეიძლება შეგძულდეს ცხოვრება, რატომ გაუუცხოვდე სამყაროს და რატომ მოიკლა თავი.

სერიალს მაყურებელთა უზამაზარი აუდიტორია ჰყავს და რეიტინგებშიც ერთ-ერთი ლიდერია.

5.დიდი პატარა ტყუილებიHBO-ს მინი-სერიალი, რომელიც ლაიან მორიარტის ამავე სახელწოდების რომანს ეფუძნება. სერიალმა გამოსვლისთანავე ძალიან დიდი გამოხმაურება გამოიწვია და მიმდევრებიც გაიჩინა. მასში მთავარ როლებს ნიკოლ კიდმანი, რიზ უიზერსპუნი და შეილინ ვუდლი ასრულებენ. სცენარი საინტერესო სტრუქტურას ეყრდნობა. სერიალის დაწყებისთანავე ინციდენტი ხდება – პოლიცია უცნობებს ჩვენებებს ართმევს და ვხვდებით, რომ ვიღაც მოკლეს, თუმცა, არ ვიცით – ვინ. პარალელურად კი სამი ქალის ისტორიასა და ცხოვრებას ვეცნობით. სამივეს თავისი ტრაგედია აქვს და როცა მათი გზები იკვეთება, ისინი ერთიანდებიან და ერთად იწყებენ ბრძოლას უკეთესი მომავლისთვის.

ჩახლართული სიუჟეტის ფონზე სერიალი აქტუალურ სოციალურ პრობლემებს ეხება, რომელთაგან ყველაზე მნიშვნელოვანი – ქალთა მიმართ ძალადობაა.

 

ხუთივე სერიალის ნახვა adjaranet.com–ზე ქართული გახმოვანებით შეგიძლიათ.

 

მოამზადა მარი ბექაურმა