21-ე საუკუნის მსახიობი ქალების 10 საუკეთესო შესრულება

nugo July 11, 2021

21-ე საუკუნის კინოში ბევრი ქალი პერსონაჟი შეიქმნა, რომელმაც ჩვენზე წარუშლელი შთაბეჭდილება დატოვა. რასაკვირველია, ეს იმ მსახიობი ქალების დამსახურებაა, რომლებიც ეკრანზე სრულიად გარდაიქმნენ და კინოს დაუვიწყარი გმირები აჩუქეს. გთავაზობთ მსახიობი ქალების 10 საუკეთესო შესრულებას 21-ე საუკუნის კინოში:

უმა თურმანი ფილმებში მოკალი ბილი

მოკალი ბილი

უმა თურმანმა კარიერის განმავლობაში ბევრ ლეგენდარულ ფილმში ბევრი ლეგენდარული პერსონაჟი განასახიერა, თუმცა ბეატრიქს კიდო მოკალი ბილიდან მაინც უკონკურენტოა. მისი პერსონაჟი ერთდროულად სასაცილოცაა, სევდიანიც, ბრაზიანიც, ძლიერიც და კიდევ უამრავი რამ. მისი ბრძოლა და ემოციები კი იმდენად რეალისტურია, რომ მაყურებელზე დაუვიწყარ შთაბეჭდილებას ახდენს. კიდოს გმირი თავად მსახიობმა მოიფიქრა კვენტინ ტარანტინოსთან ერთად და კინოსამყაროს უდაოდ ერთ-ერთი საუკეთესო ქალი პერსონაჟი აჩუქა.

ტილდა სუინტონი ფილმში უნდა ვილაპარაკოთ კევინზე

ტილდა სუინტონი

ტილდა სუინტონი დიდებული მსახიობია. მისი ყველა როლი გამორჩეულია, თუმცა ფილმში უნდა ვილაპარაკოთ კევინზე მან სრულიად დაუვიწყარი გმირი შექმნა. ევა – შუახნის მარტოსული ქალია, რომელსაც მუდმივი დამცირებისა და უსიამოვნების ატანა უხდება იმ შემთხვევის გამო, რომელმაც არამარტო მისი, არამედ მთლიანი ქალაქის ცხოვრება შეცვალა. ტილდა სუინტონის თამაში მაგიურია. მომხდარის მიუხედავად, გამორიცხულია, ევას პერსონაჟს არ თანაუგრძნო. მსახიობი ამ როლისთვის ოქროს გლობუსსა და ბაფტაზე იყო ნომინირებული.

ქეით ბლანშეტი ფილმში სევდიანი ჟასმინი

ქეით ბლანშეტი

ვუდი ალენის ფილმში ქეით ბლანშეტი თამაშობს შუახნის ქალს – ჟასმინს, რომლის ქმარიც არალეგალური ბიზნესის გამო დააპატიმრეს. ის საცხოვრებლად გადადის თავისი დის ოჯახში, რომელიც საშუალო ფენას განეკუთვნება. თუ მანამდე ჟასმინი მდიდრულად ცხოვრობდა და მუდმივად მოგზაურობდა, ახლა საკუთარ თავზე ზრუნვა თავად უწევს. ქეით ბლანშეტი ბრწყინვალედ თამაშობს ნერვულ, დესტრუქციულ ქალს, რომელიც წარსულშია დარჩენილი, იმის ნაცვლად, რომ რეალობა გაიაზროს. მსახიობმა ამ როლისთვის უამრავი ჯილდო დაიმსახურა, მათ შორის ოსკარი, ოქროს გლობუსი და ბაფტა.

ნიკოლ კიდმანი ფილმში დაბადება

ნიკოლ კიდმანი

ნიკოლ კიდმანს გასაოცარი როლების მთელი სია აქვს, თუმცა ანას პერსონაჟი ფილმიდან დაბადება, ალბათ, საუკეთესოა. ანა მდიდარი მანჰეტენელი ქალია, რომელიც ქმრის გარდაცვალებიდან ათი წლის შემდეგ კვლავ გადაწყვეტს დაოჯახებას. თუმცა, მოულოდნელი ფაქტი ისტორიას უცნაურ მიმართულებას აძლევს. შესაძლებელია, დაკარგული ადამიანის სიყვარული გაქრეს? ეს მთავარი კითხვაა, კიდმანის დახვეწილი შესრულება კი – შესაბამის და არა მძაფრ ემოციებზე გათვლილი.

ნაომი უოთსი ფილმში მალჰოლენდ დრაივი

ნაომი უოთსი

დევიდ ლინჩის ცნობილ სურათში ნაომი უოთსი თამაშობს ახალგაზრდა ქალს – ბეტის, რომელიც ლოს-ანჯელესში ჩადის, რათა მსახიობი გახდეს. ის გაიცნობს ქალს, სახელად რიტას, რომელიც ამბობს, რომ ავტოავარიის შემდეგ არაფერი ახსოვს… თავისი პერსონაჟის მსგავსად, მაშინ ნაომიც ახალბედა მსახიობი იყო ჰოლივუდში, თუმცა – ძალიან ნიჭიერი და ეს მალჰოლენდ დრაივში კარგად გამოჩნდა. ბეტის გმირი ერთროულად ღიაცაა და ენიგმატურიც, ამიტომ მსახიობის შესრულება მაყურებელში უცნაურ, სიურრეალისტურ განცდებს იწვევს.

ნატალი პორტმანი ფილმში შავი გედი

ნატალი პორტმანი

ეჭვგარეშეა, რომ ეს ნატალი პორტმანის საუკეთესო შესრულებაა. ის თამაშობს ახალგაზრდა ბალერინას – ნინას, რომლის ყოველ ნაბიჯსაც დედა აკონტროლებს. მსახიობი ნინას როლისთვის ერთი წლის განმავლობაში ემზადებოდა, რათა მართლა ბალერინასავით ეცეკვა. მისი მოძრაობები გრაციოზულია, მათ უკან კი მძიმე შრომა, ოფლი და ცრემლი დგას. პორტმანი შესანიშნავად წარმოაჩენს შეშინებულ, ნაწამებ სულს, რომელიც გაორებულ სამყაროში ცხოვრობს.

შარლოტ გეინსბურგი ფილმში ანტიქრისტე

გეინსბურგი

შარლოტ გეინსბურგმა და ლარს ფონ ტრიერმა დაამტკიცეს, რომ ძლიერი ტანდემი არიან. გეინსბურგმა რეჟისორის სამ ფილმში ითამაშა, თუმცა პირველი კოლაბორაცია – ანტიქრისტე საუკეთესოდაა მიჩნეული. აქ ის თამაშობს შვილმკვდარ დედას, რომელიც ირწმუნებს, რომ ყველა ქალის ბუნება ეშმაკეულია. მსახიობის შესრულება მშრალი და მანიაკალურია, მისი გამომეტყველება კი – უცნაური და სრულიად უნიკალური, რაც გძაბავს და ამოსუნთქვის საშუალებას არ გაძლევს. ამ როლისთვის გეინსბურგმა კანის კინოფესტივალზე საუკეთესო მსახიობი ქალის ჯილდო მიიღო.

შარლიზ თერონი ფილმში მონსტრი

შარლიზ თერონი

ამ ფილმში შარლიზ თერონი ასახიერებს რეალურ სერიულ მკვლელს – ეილინ უორნოსს, რომელმაც შვიდი მამაკაცი მოკლა. ცნობილი კრიტიკოსის, როჯერ ებერტის თქმით, ის, რაც მსახიობმა მონსტრში გააკეთა, არის ერთ-ერთი საუკეთესო შესრულება კინოს ისტორიაში; ეს არა თამაში, არამედ გარდაქმნაა. მართლაც, მსახიობის დამსახურებით, ფილმის ყურებისას ზოგჯერ გიჩნდება განცდა, რომ არა მხატვრულ, არამედ დოკუმენტური ფილმს უყურებ. შარლიზ თერონმა უორნოსის როლისთვის სხვა ჯილდოებთან ერთად, ოსკარი და ოქროს გლობუსიც დაიმსახურა.

იზაბელ იუპერი ფილმში პიანისტი ქალი

იზაბელ იუპერი

თამამად შეგვიძლია, იზაბელ იუპერი ყველა დროის ერთ-ერთ საუკეთესო მსახიობ ქალად დავასახელოთ. მისი ყველა როლი გამორჩეული და დასამახსოვრებელია, თუმცა, მათ შორის საუკეთესო, ალბათ, მაინც ერიკას როლია მიხაელ ჰანეკეს ფილმში პიანისტი ქალი. იუპერი თამაშობს ვენის კონსერვატორიის პროფესორს, რომელიც მოხუც დედასთან ერთად ცხოვრობს და პირადი ცხოვრება არ აქვს, თუმცა აქვს – ძალიან უცნაური და მაზოხისტური სექსუალური აქტები. იუპერის თამაში ნამდვილი სამსახიობო მასტერკლასია და შესაბამისადაც აღინიშნა 2001 წლის კანის კინოფესტივალზე.

ოლივია კოლმანი ფილმში ფავორიტი

ოლივია კოლმანი

2019 წლის ოსკარებზე საუკეთესო მსახიობი ქალის კატეგორიაში ოლივია კოლმანმა გაიმარჯვა. ეს მისი პირველი მთავარი როლი იყო მხატვრულ ფილმში. იორგოს ლანთიმოსის ფავორტში მან განასახიერა დედოფალი ანა – ერთდროულად სასტიკი და ბავშვივით ჭირვეული, ეგოისტი, უწესრიგო, სიყვარულის მომთხოვნი, აბსოლუტურად გაუწონასწორებელი ქალი, რომელმაც 17 შვილი დაკარგა. კოლმანის თამაში ზუსტად ისეთ მძაფრ ემოციებს იწვევს მაყურებელში, რა სიმძაფრეც პერსონაჟს აქვს. ის, რაც ფავორიტში ვნახეთ, უდაოდ ერთ-ერთი საუკეთესო შესრულებაა არათუ 21-ე საუკუნის, არამედ მთლიანად კინოს ისტორიაში.

 

წყარო: www.tasteofcinema.com