21-ე საუკუნის 10 საუკეთესო ლათინოამერიკული ფილმი

nugo July 11, 2021

არაჩვეულებრივი პერსონაჟები, სოციალური უთანასწორობა, რთული პოლიტიკური ვითარება, ქალაქებისა და ბუნების უცვლელი პეიზაჟები – ეს ლათინოამერიკული ფილმების ძირითადი შემადგენელი ნაწილებია. 20-ე საუკუნე ლათინოამერიკული კინოსთვის მნიშვნელოვანი პერიოდი იყო, როდესაც იქმნებოდა ისეთი მნიშვნელოვანი ნამუშევრები, რომლებიც მსოფლიო კლასიკად იქცა, როგორებიცაა 1950 წლის “დავიწყებულნი”, 1985 წლის “ოფიციალური ვერსია” და სხვა. საერთო ჯამში ისინი ახალი ტალღის ორიენტირად იქცნენ. 1998 წელს არაჩვეულებრივმა დრამამ “ცენტრალური სადგური” თითქოს შეაჯამა მანამდე გადაღებული ყველა ნამუშევარი…

2000 წლიდან ახალი ტალღის წარმომადგენელი რეჟისორები ანებივრებენ მაყურებელს, რამდენიმე მათგანმა კი მნიშვნელოვანი ადგილი დაიკავა ჰოლივუდშიც, მაგალითად ალფონსო კუარონი და ალეხანდრო გონსალეს ინიარიტუ.

წარმოგიდგენთ 21-ე საუკუნის საუკეთესო ლათინოამერიკულ ფილმებს, რომლებიც ნამდვილად იმსახურებენ თქვენს ყურადღებას.

 

სიყვარული ბოროტია (2000)

“სიყვარული ბოროტია” ინიარიტუს სრულმეტრაჟიანი ფილმებიდან დებიუტია, რომელმაც რეჟისორს საერთაშორისო აღიარება მოუტანა. სწორედ ამ ფილმში დაიბადა მისი თხრობის ნოვატორული სტილი. სიუჟეტში იკვეთება სხვადასხვა ისტორიები განსხვავებული პერსონაჟებით. ასეთივე ხერხს მიმართა მან ფილმებში “21 გრამი” და “ბაბილონი”. ამ ფილმში გარდამტეხი მომენტი ავტოკატასტროფაა, რომელიც ბევრ პერსონაჟს შეეხო – ყველაზე მდიდარიდან დაწყებული, ყველაზე ღარიბით დამთავრებული.

ცხრა დედოფალი (2000)

ბედისწერა ორ თაღლითს ახვედრებს ერთმანეთს. ისინი ერთმანეთს თავიანთ საიდუმლოებს უმხელენ, საერთო მაქინაციებს ეკიდებიან და, შესაძლოა, კარგად გამომუშავების ხერხსაც პოულობენ. მომენტალური ქიმია, რომელიც ორ პერსონაჟს შორის ჩნდება, ფილმის მთავარი ღირებულებაა. ამის გარდა, აუცილებლად ჩაგითრევთ ჩახლართული სიუჟეტი, თითოეული პერსონაჟის ნამდვილი ხასიათის გამოაშკარავება და მათი ღირებულებები.

დედაშენიც აგრეთვე (2002)

ეს ერთ-ერთი ყველაზე მაღალშემოსავლიანი მექსიკური ფილმია, რომელმაც უამრავი ჯილდო აიღო. გაელ გარსია ბერნალი და დიეგო ლუნა საუკეთესო მეგობრების როლებს ასრულებენ, რომლებიც სკოლის ბოლო არდადეგებზე მანქანით მოგზაურობას გადაწყვეტენ. გზაში ისინი ერთმანეთს 28 წლის გოგონას მოხიბლვაში ეჯიბრებიან, რომელიც მათ მოულოდნელად შეუერთდა. მხოლოდ ერთი შეხედვით შეიძლება ითქვას, რომ ეს ახალგაზრდული სექს-კომედიაა. სინამდვილეში, ეს სამოგზაურო ფილმია, რომელსაც ორაზროვანი ფსკერი გააჩნია. ორი მეგობრისა და ზრდასრული ქალის თვალის მიდევნებით, მშვენიერი მექსიკური პეიზაჟების ტკბობით, ჩვენ ვხედავთ, როგორი განსაცდელი შეიძლება იყოს მეგობრობისთვის კონკურენცია ქალის ყურადღებისთვის. მაგრამ მხოლოდ ბოლოში ხდება გასაგები, თუ რა იყო ნამდვილი მოტივები, რომელიც მთავარ პერსონაჟებს ამოძრავებდათ….

ღმერთის ქალაქი (2003)

ეს ფილმი, რომელიც სოციალური რეალიზმის სტილშია გადაღებული, ოსკარის ოთხ კატეგორიაში იყო ნომინირებული. ის ბრაზილიური ღარიბი უბნების და მათი მოსახლეობის ევოლუციას აღწერს რიო-დე-ჟანეიროში 1960-იანი წლებიდან 1980-იან წლებამდე. სიუჯეტი ორ ურთიერთსაპირისპირო პერსონაჟზე ამახვილებს ყურადღებას: გულუბრყვილო ბიჭი, რომელიც ცდილობს სწორად მოიქცეს და პატიოსნად იცხოვროს და მისი დიდი ხნის ნაცნობი, რომელიც რიო-დე-ჟანეიროში ერთ-ერთი ყველაზე საშიში განგსტერია. ეს კინემატოგრაფიული შედევრი არაჩვეულებრივად ახერხებს გადმოგვცეს, თუ რამდენად მნიშვნელოვანია სოციალური პირობები ადამიანებისთვის.

მაჩუკა (2004)

სიუჟეტის ცენტრში, რომელიც რეალურ მოვლენებს ეყრდნობა, ორი განსხვავებული სოციალური ფენის ბავშვის მეგობრობის ისტორია აღმოჩნდა. ისინი ექსპერიმენტის მონაწილეები არიან, რომელიც ჩილეში 1970-იან წლებში ტარდებოდა. უჩვეულო და საეჭვო პროგრამის ფარგლებში პრესტიჟულ სკოლაში მდიდარი ოჯახისა და ღარიბი ოჯახის შვილები გააერთიანეს. მოვლენები არასტაბილური პოლიტიკური ვითარების და სოციალური კონფლიქტების ფონზე ვითარდება. საზოგადოებას პოლიტიკური შეხედულებები ყოფს, მაგრამ ადამიანის ნამდვილი ბუნება მეგობრობაში გამოიხატება.

საიდუმლო მათ თვალებში (2010)

ხუან ხოზე კამპანელიას ემოციური, ამაღელვებელი ფილმი, რომელიც მსოფლიო კინემატოგრაფიის შედევრად არის აღიარებული. ეს კრიმინალური დრამა თქვენს ყურადღებას პირველივე წუთებიდან მიიპყრობს გამაოგნებელ ფინალამდე. 1974 წელს ფედერალურმა აგენტმა ქალების გაუპატიურების და გოგონების მკვლელობის საქმის გამოძიება გადაწყვიტა. წლების შემდეგ მან დიდი ხნის წინ ჩავლილ მოვლენებზე წიგნი დაწერა.

არა (2012)

ამბიციური პოლიტიკური ფილმი იდეის ძალაზე და ნიჭიერი ადამიანების როლზე, რომლებსაც, გაერთიანების შედეგად, შეუძლიათ მილიონობით ადამიანის ისტორიის შეცვლა. ფილმი ანტონიო სკარმეტას თეატრალური პიესის “პლებისციტის” ადაპტაციაა, რომელიც ჩილეს ოპოზიციური დიქტატორის აუგუსტო პინოჩეტის მიერ ტრიუმფალურად ჩატარებულ პოლიტიკურ კამპანიას ეძღვნება.

ცუდი ვარცხნილობა (2013)

9 წლის ბიჭს კარაკასიდან თავისი ხუჭუჭა თმები აწუხებს და ყველანაირად ცდილობს მათ გასწორებას, რომ სკოლის ყოველწლიურ ფოტოალბომში პოპ-ვარსკვლავივით გამოიყურებოდეს. ამ დროს დედამისი იბრძვის გადასარჩენად, ეჩეხება მარტოხელა დედებისთვის ტიპურ ყოველდღიურ პრობლემებს. დაბალი ხელფასი, დისკრიმინაცია სქესის ნიშნით და ცხოვრების დაბალი დონე ხდება დაბრკოლება, რომლის გამოც ის ვეღარ ახერხებს სრულყოფილად შეასრულოს დედის როლი. რა თქმა უნდა, უბრალოდ პრობლემა, რომელიც ბიჭის თმების ირგვლივ ტრიალებს, სიტყვის თავისუფლების და ტრადიციული ვენესუელას საზოგადოების აზრის პარალელი ხდება და ეხება ისეთ თემას, როგორიცაა ოჯახის როლი ბავშვის სექსუალურ ორიენტაციაში.

ველური ისტორიები (2014)

ეს ის იშვიათი შემთხვევაა, როდესაც თხრობა დაწყებიდან ფინალამდე გითრევთ. ეს არგენტინული შავი კომედიაა, რომელიც ოსკარზე საუკეთესო უცხოენოვანი ფილმისთვის იყო ნომინირებული. ის ექვსი აბსურდული, ერთმანეთთან დაუკავშირებელი ისტორიებისგან შედგება, რომლებიც ძალადობის, მრისხანების, ღალატის და შურისძიების თემებზე ამახვილებს ყურადღებას. თავისებურად მშვენიერია თითოეული მათგანი. ფილმის ერთ-ერთი მთავარი ღირებულება ისაა, თუ რამდენად ზუსტად არის აღნიშნული ცხოველური ინსტინქტები ადამიანებში და ადამიანური ქცევები ექსტრემალურ სიტუაციებში.

ფავნის ლაბირინთი (2006)

ფილმი, რომელიც ფერადი ფერიებით სავსე ზღაპრიდან, ბოლოს დრამაში იზრდება, რომელიც ბევრ თემას ეხება, მათ შორის ადამიანის სულის და ზოგადად ადამიანურობის ასპექტებს. ყველა პერსონაჟი გამორჩეულია, თითოეული მათგანი გვაძლევს საბაბს ჩავუღრმავდეთ დეტალებს. ერთი შეხედვით, შეუძლებელია ისეთი ორი კომპონენტის შერწყმა, როგორიცაა საბავშვო ზღაპარი და ასეთი ღრმა ფილოსოფია, მაგრამ ასე მხოლოდ ისინი თუ იტყვიან, ვისაც ეს ფილმი ჯერ არ უნახავს. გილერმო დელ ტოროს ფილმმა ოსკარის ექვსი ნომინაციიდან სამში გაიმარჯვა.