21-ე საუკუნის 10 საუკეთესო ფილმი LGBTQ თემაზე

nugo July 10, 2021

დროთა განმავლობაში LGBTQ თემაზე გადაღებული ფილმების რაოდენობა სულ უფრო და უფრო იზრდება და კულმინაციას მაშინ მიაღწია, როდესაც “მთვარის შუქმა” ოსკარი საუკეთესო სურათისთვის მიიღო. უკვე გაჩნდა მოლოდინიც, რომ ფილმებში მუდმივად ითქვას რაიმე ახალი ამ თემაზე. მეტად იყოს ნაჩვენები პრობლემები, დაბრკოლებები, დამოკიდებულებები და მოგვარების, ბრძოლის გზები.

ჩვენ კი წარმოგიდგენთ 21-ე საუკუნის გამორჩეულ ფილმებს, რომელიც სწორედ ამ თემას, LGBTQ-ს მიეძღვნა.

უიქენდი (2011)

ფილმი ორი მამაკაცის ცხოვრების ორ დღეზე მოგვითხრობს, რომლებიც ერთმანეთს გეი-კლუბში შეხვდნენ და მალევე ხვდებიან, რომ ერთმანეთისადმი ძლიერი გრძნობები აქვთ. აქ ერთადერთი პრობლემა ჩნდება: ერთ-ერთმა მათგანმა ძალიან მალე უნდა დატოვოს ქვეყანა. როგორც მის მომდევნო ფილმში “45 წელი”, ენდრიუ ჰეი მაყურებლის ემოციებზე მარტივი ხრიკით მოქმედებს – ის დროის მოკლე პერიოდს იღებს. ფილმი ბევრი ქმედებით არ გამოირჩევა. რეჟისორი იმ ცხოვრებისეული ნიუანსებით არის დაინტერესებული, რომლებიც როგორც წესი, ყველაზე მოკლე დროში ვლინდება. საბოლოო ჯამში, ფილმი იმედისმომცემია. ეს ორდღიანი გზა, რომელზეც ორი მამაკაცი დგას, მალევე აჩვენებს სწორ მიმართულებას და დაბრკოლებების მიუხედავად, პრობლემების მოგვარებას ჰპირდება.

ჰარვი მილკი (2008)

ქარიზმატული პოლიტიკოსის ცხოვრების და ტრაგიკული სიკვდილის ისტორია ადამიანზე, რომელიც თავისუფლებისა და ტოლერანტობისთვის იბრძოდა. ამერიკაში ჰომოსექსუალები დიდი ხნის განმავლობაში იყვნენ იძულებულები დამალულიყვნენ, რადგან მათ მუდმივად განიკითხავდნენ და სასტიკად სჯიდნენ – ისინი ავადმყოფ, გარყვნილ ადამიანებად ითვლებოდნენ. გას ვან სენტის “ჰარვი მილკი” არის ფილმი, რომელიც არაჩვეულებრივად აღწერს პარადოქსულ 70-იან წლებს. ფილმმა ოსკარი საუკეთესო ორიგინალური სცენარისთვის, შონ პენმა კი – ოსკარი საუკეთესო მსახიობი კაცისთვის მიიღო.

დამწყებები (2011)

ოლივერი ნიჭიერი გრაფიკული დიზაინერია, რომელიც ანას იცნობს და ხვდება, რომ გრძელვადიან ურთიერთობებში ის დამწყებია. მოგონებები მამაზე, რომელიც საკმაოდ ხანდაზმულ ასაკში, შვილს თავისი სექსუალური ორიენტაციის შესახებ გამოუტყდა და რომ მას ახალგაზრდა ბოიფრენდი ჰყავს. ეს ყველაფერი კი ოლივერს სითამამეს მატებს, რომ სერიოზული ურთიერთობა ააწყოს. კრისტოფერ პლამერმა მამის როლისთვის ოსკარი საუკეთესო მსახიობი კაცისთვის მეორეხარისხოვან როლში მიიღო.

ბავშვები კარგად არიან (2010)

ეს კომედია არანორმალურ კალიფორნიულ ოჯახზეა, სადაც ორი “დედიკო” (ჯულიანა მური და ანეტ ბენინგი) ხელოვნური განაყოიერების გზით გაჩენილ ორ მოზარდს ზრდის. ყველაფერი ირევა, როდესაც მათ ცხოვრებაში მარკ რუფალოს პერსონაჟი, ბავშვების ბიოლოგიური მამა ჩნდება და მოვლენები სულელურ, სასაცილო, ხანდახან კი სევდიან სიტუაციებად იქცევა. ამ ფილმის პერსონაჟები სხვა წყვილებს არ გვანან და ალბათ ეს არის ერთ-ერთი მიზეზი, რითიც ეს ნამუშევარი გამოირჩევა. აღსაღნიშნია მურის და ბენინგის არაჩვეულებრივი შესრულება, რომლებიც კიდევ ერთხელ შეგვახსენებენ, რომ გეებს და ლესბოსელებს ისეთივე პრობლემები და ნაკლები აქვთ, როგორც ნებისმიერ ჰეტეროსექსუალ წყვილს. ფილმი ოსკარის ოთხ კატეგორიაში იყო ნომინირებული.

და მაინც ლოურენსი (2013)

ვუნდერკინდის ქსავიე დოლანის შესანიშნავი ფილმი, რომლის ნაცვლადაც ამ სიაში შეიძლებოდა მოხვედრილიყო მისივე წარმოუდგენელი სადებიუტო ნამუშევარი “მე მოვკალი დედაჩემი”, ან “ტომი ფერმაში”, მაგრამ ეს არის ფილმი, რომელიც დოლანის ერთ-ერთ ყველაზე ძლიერ ფილმად ითვლება. ისტორია მოგვითხრობს ტრანსგენდერზე და ქალზე, რომელიც გულგრილს არავის დატოვებს. დოლანი ბოლო ათი წლის მანძილზე ერთ-ერთი ყველაზე განსხვავებ23ული და გამორჩეული კინორეჟისორია, არა მხოლოდ მისი ისტორიის თხრობის მანერით, არამედ იმ ემოციებით, რომლებსაც მისი მსახიობები ასხივებენ.

კუზიანი მთა (2005)

ენგ ლის ფილმი ენი პროუქსის მოთხრობას ეფუძნება, რომელიც პირველად 1997 წელს დაიბეჭდა. ორი კოვბოის ისტორია აკრძალულ სიყვარულზე გამოირჩევა, როგორც რომანტიკულობით, ისე თავშეკავებულობით. ჰიტ ლეჯერი და ჯეიკ ჯილენჰოლი არაჩვეულებრივად გადმოსცემენ თავიანთი ემოციების და განსჯის იმ ეპოქის სირთულეებს, რომელშიც მათ ერთმანეთი შეუყვარდათ. ფილმი ოსკარზე 8 კატეგორიაში იყო ნომინირებული, რომლიდანაც სამში გაიმარჯვა.

ფანტასტიური ქალი (2017)

ფილმი მოგვითხრობს ტრანსგენდერ ქალზე, რომელიც უარს ამბობს შეეწინააღმდეგოს წინასწარ შექმნილ ცუდ აზრებს. ფილმში მთავარ როლს ტრანსგენდერი ქალი, დანიელა ვეგა ასრულებს. აღსაღნიშნავია, რომ ეს მისი პირველი მთავარი როლია. ფილმა მიიღო ოსკარი საუკეთესო უცხოენოვანი ფილმისთვის.

ლურჯი ყველაზე თბილი ფერია (2013)

სამ საათიანი ფილმი, რომელიც  თავიდან ბოლომდე უდიდესი გამოცდილებაა. ის მოგვითხრობს მგრძნობიარე ახალგაზრდას, ადელის ისტორიას, რომლის ცხოვრებაც რადიკალურად შეიცვალა, მას შემდეგ, რაც ლურჯთმიან გოგონას შეხვდა. ამ მომენტიდან ის მოგვითხრობს უნიკალური სიყვარულის ისტორიას და მის თითოეულ ნაბიჯს საწყისი ეტაპიდან შემზარავ დაშორებამდე. აბდელატიფ კეშიშის ფილმში, რომელიც ოქროს გლობუსზე საუკეთესო უცხოენოვანი ფილმისთვის იყო ნომინირებული, მთავარ როლებს ლეა სეიდუ და ადელ ეგზარქოპულოსი ასრულებენ.

სანგალის ზაფხული (2015)

ჩამოთვლილი ფილმების უმეტესი ნაწილის მოქმედება ზაფხულში ვითარდება. ეს არის პერიოდი, როდესაც არ დადიხართ სკოლაში, ან შვებულებაში ხართ. ეს ასევე არის პერიოდი, როდესაც უფრო რთული ხდება უარყოთ საკუთარი გრძნობები. სანგალის ზაფხული ამის კარგი მაგალითია, ფილმი მოგვითხრობს ორი გოგოზე, რომლებსაც ერთმანეთი ტბებთან სიცილის, ველოსიპედით სეირნობის, სიგარეტის მოწევის და სიმთვრალის დროს შეუყვარდათ.

ქეროლი (2015)

ფილმი, რომელიც პატრიცია ჰაისმიტის ნოველას ეყრდნობა, 1950-იანი წლების ლესბოსელების სიყვარულს ეძღვნება. ფილმში ქეით ბლანშეტი ასრულებს ასაკოვანი ქალის როლს, რომელიც მაღაზიის გამყიდველით იხიბლება, როდესაც ის მისი ქალიშვილისთვის საშობაო საჩუქარს ფუთავს. ეს არის თანამედროვე კინემატოგრაფიაში ერთ-ერთი ყველაზე გავლენიანი სიყვარულის ისტორია. ბლანშეტის და რუნი მარას არაჩვეულებრივი დუეტის დამსახურებით “ქეროლი” ნამდვილ კლასიკად იქცა. ფილმი ოსკარზე 6 კატეგორიაში იყო ნომინირებული.

მთვარის შუქი (2016)

ფილმი სამ ნაწილად არის დაყოფილი და ის ახალგაზრდა ბიჭის ცხოვრებას აღწერს, რომელიც ცდილობს თავის სექსუალობაში გარკვევას. ფილმი გვიჩვენებს, როგორია გაიზარდო ღარიბი, შავკანიანი და გეი სამყაროში, სადაც ყველაფერი შენ წინააღმდეგ არის მომართული. უნდა აღინიშნოს ოპერატორის ნამუშევარი, რომლის დამსახურებითაც უჩვეულო თანაგრძნობის შეგრძნება გვეუფლება მთავარი გმირისადმი. ფილმმა ოსკარი, როგორც აღვნიშნეთ, საუკეთესო სურათისთვის და ასევე საუკეთესო ადაპტირებული სცენარისთვის მიიღო, მაჰერშალა ალიმ კი ოქროს ქანდაკება საუკეთესო მსახიობი კაცისთვის მეორეხარისხოვან როლში დაიმსახურა.

შენი სახელით მომმართე (2017)

ფილმი 17 წლის ბიჭზე, ელიოზე მოგვითხრობს, რომელიც ასპირანტი ოლივერით არის გატაცებული. მისი ოლივერისადმი ლტოლვა იმდენად დიდია, რომ ის წყვეტს თავისი ნაჭუჭიდან გამოვიდეს და თავის გრძნობები გააგებინოს. მოვლენები ისევ და ისევ ზაფხულის პერიოდში ვითარდება. სცენარი რომანისტული დეტალებით არის სავსე. ფილმში მთავარ როლებს არმი ჰამერი და იმედისმომცემი ამომავალი ვარსკვლავი ტიმოთი შალამე, რომელიც ოსკარზე საუკეთესო მსახიობი კაცისთვის იყო ნომინირებული, ასრულებენ. ფილმმა “შენი სახელით მომმართე” ოსკარი საუკეთესო ადაპტირებული სცენარისთვის მიიღო.