21-ე საუკუნის 10 ყველაზე გავლენიანი ფილმი

nugo July 11, 2021

ორი აზრი არაა, რომ კინო ჩვენს თვალსაწიერს აფართოებს და ერთ-ერთია ხელოვნების სფეროებიდან, რომელსაც ზეგავლენის დიდი უნარი აქვს. გთავაზობთ 21-საუკუნის 10 ყველაზე გავლენიან ფილმს:

ბეჭდების მბრძანებელი: ბეჭდის საძმო (2001)

ბეჭდების მბრძანებელი

ბეჭდების მბრძანებელი 11 სექტემბრის ტერაქტიდან 3 თვის შემდეგ გამოვიდა და შეიძლება ითქვას, რომ ეს იყო ზუსტად ის ფილმი, რომელიც ხალხს სჭირდებოდა. კეთილისა და ბოროტის დაპირისპირება. ჰობიტი ფროდო ბიძისგან მემკვიდრეობით იღებს იდუმალებით მოცულ ბეჭედს, რომლის დაცვაც უხდება ბოროტი მბრძანებლისგან. ამაში კი მას ბეჭდის საძმო ეხმარება. ესაა ტოლკინის ჯადოსნური სამყარო, რომელიც პიტერ ჯეკსონმა ეკრანზე გააცოცხლა.

კაცობრიობის პირმშო (2006)

კაცობრიობის პირმშო

ალფონსო კუარონის კაცობრიობის პირმშო კრიტიკოსების მიერ ერთ-ერთი ყველაზე დაფასებული კინოსურათია, სადაც მოვლენები 2027 წელს ვითარდება. ფილმში ნაჩვენებია სამყარო, რომელიც განადგურების პირასაა კლიმატის ცვლილებების, დაბინძურებისა თუ ბირთვული ნარჩენების გამო. საზოგადოება გახლეჩილია. ყველგან ტერორიზმის საფრთხე არსებობს. მთავარი კი ისაა, რომ ბოლო 18 წლის შემდეგ კიი პირველი ქალია, რომელიც დაორსულდა…

ფავნის ლაბირინთი (2006)

ფავნის ლაბირინთი

გილერმო დელ ტორომ ფავნის ლაბირინთით ფენტეზის თავდაპირველ ცნებასთან მიგვაბრუნა. ფილმის სიუჟეტი მეორე მსოფლიო ომის დროს ვითარდება. პატარა ოფელიასთვის წიგნები და ზღაპრები ცხოვრების განუყოფელი ნაწილია. ერთ დღესაც გოგონა აღმოაჩენს, რომ ჯადოსნური სამყარო რეალურია და ამ სამყაროში შეაბიჯებს…

ოლდბოი (2003)

ოლდბოი

15-წლიანი პატიმრობა დანაშაულისთვის, რომელზეც წარმოდგენა არ გაქვს. არც იმაზე გაქვს წარმოდგენა, ვინ დგას ამ შურისძიების უკან, ვინ არის შენი მტერი… ჩან-ვუკ პაკის ოლდბოი ჩვენი საუკუნის ერთ-ერთი საუკეთესო კინოსურათია, რომელიც სავსეა ძალადობით, ბრუტალური სცენებითა და გმირების შემაძრწუნებელი ტანჯვით. ესაა ფილმი, რომელმაც კორეულ კინოს ამერიკაში ის კარი გაუხსნა, მანამდე არასდროს რომ არ ჰქონია.

ბნელი რაინდი (2008)

ბნელი რაინდი

კრისტოფერ ნოლანმა ბნელი რაინდით არა გასართობი, არამედ ინტელექტუალური და პროვოკაციული ფილმი შექმნა. ბეტმენი გახდა გმირი, რომელიც ადამიანებს სჭირდებოდათ. მას ბევრი მტერი ჰყავს, თუმცა, მისი ყველაზე დიდი მტერი საკუთარი თავია. რაც შეეხება ჯოკერს, ამ ქაოსური და იდუმალი პერსონაჟის ქმედებებს არანაირი ლოგიკა არ გააჩნია. ბნელი რაინდი არის ფილმი, რომელმაც უამრავი წესი დაარღვია და რომლითაც ახალი ერა დაიწყო.

მოხუცების ადგილი აქ არ არის (2007)

კოენები

რიო-გრანდეს მახლობლად მონადირე შემთხვევით წააწყდება გვამებს, ჰეროინის პარტიასა და ორ მილიონ დოლარს, რაც საშინელი ძალადობისა და არეულობის დასაწყისად იქცევა. სიუჟეტის ცენტრში ანტონ ჩიგურია – მკვლელი, რომლის შეჩერებაც არავის ძალუძს და რომელსაც თავისი მორალური კოდექსი აქვს… ამ ფილმით ძმებმა კოენებმა კინოს შექმნის ოსტატობა სულ სხვა დონეზე აიყვანეს.

ნავთობი (2007)

ნავთობი

მას შემდეგ, რაც დენიელ ფლეინვიუ კალიფორნიაში ნავთობით მდიდარი მიწის შესახებ გაიგებს, ადგილობრივი მესაკუთრეებისგან მოტყუებით იწყებს მიწის შესყიდვას. რაც უფრო გავლენიანი და მდიდარი ხდება იგი, მით უფრო კარგავს ადამიანურ სახეს. პოლ ტომას ანდერსონის ნავთობი ოჯახის, რელიგიის, სიძულვილისა და სიგიჟის გენიალური ისტორიაა.

მალჰოლენდ დრაივი (2001)

მალჰოლენდ დრაივი

დევიდ ლინჩი მთელი თავისი შემოქმედებით ცდილობდა, ადამიანის ცნობიერება ეკვლია და მისი ყველაზე დაფარული მხარეები გამოევლინა. ამის ყველაზე ნათელი მაგალითი კი მალჰოლენდ დრაივია. ლოს-ანჯელესში მსახიობობის სურვილით ჩამოსული ბეტი ხვდება რიტას, ქალს, რომელსაც ავტოავარიის შემდეგ არაფერი ახსოვს. ეს სიურრეალისტური ფილმი ერთ-ერთია 21-ე საუკუნის კინოდან, რომელმაც მაყურებელზე უზარმაზარი გავლენა იქონია.

უსახელო ნაბიჭვრები (2009)

ნაბიჭვრები

ნაცისტების მიერ ოკუპირებულ საფრანგეთში ებრაული წარმოშობის ამერიკელი ჯარისკაცებისგან იქმნება ჯგუფი, რომელიც ნაცისტებს სასტიკი მეთოდებით უსწორდება. ესაა მეორე მსოფლიო ომის სრულიად განსხვავებული ისტორია, ტარანტინოსთვის დამახასიათებელი სტილითა და ინდივიდუალობით.

ღმერთის ქალაქი (2003)

ღმერთის ქალაქი

მე-20 საუკუნის 70-იანი წლები. რიო-დე-ჟანეიროს გეტოები. კრიმინალური ბანდები და ბავშვები, რომლებსაც ხელში იარაღი უჭირავთ. ღმერთის ქალაქში ისაა უფრო ძლიერი, ვინც უფრო სასტიკია. ამ ფილმმა განვითარებულ მსოფლიოს მათი კომფორტის მიღმა არსებული – სიღარიბით, ძალადობითა და დაუნდობლობით აღსავსე სამყარო უჩვენა.