Nickelodeon-ის 12 საუკეთესო მულტფილმი

nugo July 10, 2021

Nickelodeon ყველა ბავშვის საყვარელი არხია (და, ვაღიაროთ, ტელეარხების თვალიერებისას დღესაც ხშირად შევჩერებულვართ მასზე), რომელმაც მაუწყებლობა გვიან 70-იანებში დაიწყო. მისმა პოპულარობამ პიკს 80-იანი წლების შუაში მიაღწია და თამამად მოიხსენიებდნენ “პირველ საბავშვო არხად”.

ნიკელოდეონზე გადიოდა ეთერში დღეს უკვე კლასიკად ქცეული მულტსერიალები, რომლებმაც არამარტო მცირე ასაკის მაყურებლის, არამედ უფროსების გულებიც მოიგო. 21-ე საუკუნეში კი ნიკელოდეონის ფილმების ჩამონათვალს ახალი სახელები შეემატა

დღეს გადავწყვიტეთ, ნიკელოდეონის 12 საუკეთესო მულტფილმი წარმოგიდგინოთ. ერთად გავიხსენოთ ჩვენი ბავშვობის არხი და ფავორიტი პერსონაჟები.

1. CatDog (კატაძაღლი)

ერთი კატა, ერთი ძაღლი – ერთი სხეული. წარმოგიდგენიათ, რა დონის პარადოქსია? ეს მულტფილმი დღემდე უამრავ კითხვას გვიჩენს, მაგალითად, როგორ იყენებენ აბაზანას? რანაირად ახერხებენ კატების და ძაღლების მარადიული მტრობის დაძლევას და ერთმანეთის საუკეთესო მეგობრობას? კატაძაღლი უამრავი კომპრომისის მაგალითია. ამ შუალედური ბიოლოგიური კლასის პერსონაჟის მაგალითზე ჩვენ ვისწავლეთ, რომ კატის და ძაღლის ჰიბრიდის არსებობა თითქმის შეუძლებელია.

კატაძაღლი სავსეა საინტერესო პერსონაჟებით. თაგვი, მეზობელი ბოროტი ძაღლები, კურდღელი და სხვა საინტერესო ტიპაჟები განსხვავებულთა თანაცხოვრების სირთულეებს და მათთან დამოკიდებულებას გვასწავლიან.

2. ჯიმი ნეიტრონის, გენიოსი ბიჭუნას თავგადასავლები

თავდაპირველად ფილმის სახით გამოსული ჯიმი ნეიტრონი ამერიკის პატარა ქალაქში მცხოვრები გენიოსი გამომგონებელი ბიჭუნას თავგადასავალია. სერიალის, რომელმაც სასკოლო ასაკის მილიონობით მაყურებლის გული მოიგო, მხოლოდ სამი სეზონია გამოსული.  ახირებული ვარცხნილობისა და კიდევ უფრო უცნაური აზროვნების მქონე 11 წლის ექსპერიმენტატორისა და მისი მეგობრების საოცარი და სახალისო თავგადასავლები მსოფლიოს ნებისმიერ მოსწავლეს აღაფრთოვანებს.

3. The Fairly Oddparents (ფერია ნათლიები)

როგორც ამ მულტფილმის თემის სიმღერაში ამბობენ, ტიმი ტერნერი “ჩვეულებრივი ბავშვია, რომელსაც ვერავინ უგებს”, თუმცა მერე ირკვევა, რომ ის ჩვეულებრივზე მაგარი ბიჭია, რადგან ორი ჯადოსნური თევზი ჰყავს, რომლებიც სინამდვილეში მისი ფერია ნათლიები – კოსმო და ვანდა არიან. სულერთია, სად ჩაიფიქრებს სურვილებს ტიმი – კალიფორნიის გამოგონილ ქალაქ დიმსდეილში თუ ფერიების სამყაროში, ის მაინც ახერხებს ყველაფრის არევ-დარევას.

4. The Wild Thornberrys (თორნბერების ველური ოჯახი)

ვის არ შურდა ელიზა თორნბერის საიდუმლო ნიჭის, რომლის წყალობითაც ცხოველებთან საუბარი შეეძლო? ან ვის არ უნდოდა, მასავით უჩვეულო, თავგადასავლების მაძიებელი ოჯახი ჰყოლოდა? თორნბერების ველური ოჯახი ყველა ბავშვში თავზეხელაღებული თავგადასავლების წყურვილს აღვიძებს და მსოფლიოს ყველაზე საინტერესო ადგილების შეცნობის სურვილს უჩენს. თორნბერების ოჯახს ახალი ეპიზოდები 2004 წლის შემდეგ აღარ შემატებია, იგი სამ ფილმად გააერთიანეს და მას დღემდე სიამოვნებით უყურებენ ამ შესანიშნავი მულტსერიალის ფანები.

5. As Told by Ginger (როგორც ჯინჯერი ამბობს)

ეს ერთ-ერთი მულტფილმთაგანია, რომლის გმირებიც ჩვენ თვალწინ იზრდებიან და ცხოვრებისეულ შეხედულებებს იცვლიან. ალბათ ყველა პრეთინეიჯერული ასაკის გოგონა აიგივებდა თავს ჯინჯერ ფოტლისთან, რომელიც პირად თუ საზოგადოებრივ ცხოვრებაში იმავე პრობლემებისა და გამოწვევების წინაშე დგას, რომლებიც ყველას გაგვივლია.

შოუ მხოლოდ სამი სეზონისა და 60 ეპიზოდისგან შედგება, თუმცა ეთერში თითქმის ექვსი წლის განმავლობაში გადიოდა.

6. The Angry Beavers (ბრაზიანი თახვები)

ბრაზიან თახვებს მართლაც აქვთ გაბრაზების მიზეზი: ძმები, დაგეტი და ნორბერტი უმცროსი დების დაბადების შემდეგ აიძულეს, გამოგონილ ქალაქში ვეიოუტათაუნში გადაბარგებულიყვნენ. ახალი საცხოვრებლისკენ გზად თახვები უამრავ საინტერესო პერსონაჟს ხვდებიან და ახალ ცხოვრებასაც ნელ-ნელა ეგუებიან. ბრაზიანი თახვების დებიუტი აშშ-ში 1997 წელს შედგა, კანადას კი თორმეტი წლის შემდეგ – 2009-ში მიაღწია, 2011 წელს კი TeenNick-ის 90-იანების ნოსტალგიაში ხელახლა გაუშვეს.

7. Rocket Power (რაკეტის ძალა)

ყველა ექსტრემალური ბავშვის საოცნებო მულტფილმი. რაკეტის ძალა, რომლის მთავარი პერსონაჟები ოტო, მორისი, სემი და რეგი სერფინგის, სკეიტისა და სხვა ექსტრემალური სპორტის დიდოსტატები არიან, შთააგონებენ და საკუთარი თავის რწმენით ავსებენ პატარა მაყურებელს.

8. Aaahh!!! Real Monsters (აააა!!! ნამდვილი მონსტრები)

აააა! ნამდვილი მონსტრები მანამდე გახდა პოპულარული, სანამ ცნობილ მონსტრების კორპორაციას გადაიღებდნენ. მულტფილმს ნიუ-იორკის მონსტრების სკოლის მოსწავლე ნაირნაირ მონსტრებზე, რომლებსაც საშინაო დავალებად ადამიანების შეშინებას აძლევენ, ვიკიპედიაზე, “კომედიური ჰორორის” ჟანრი აქვს მინიჭებული. ნამდვილი მონსტრები ბავშვებს ასწავლის, რომ ნებისმიერი საშიში პერსონაჟი, რომელსაც კარგად გაიცნობ, აღარც ისე საშიშია.

9. Rugrats (პაწაწინა ონავრები)

90-იანებში დაწყებული პაწაწინა ონავრები ნიკელოდეონის ეთერში მთელი 13 წელი გადიოდა და საოცარი პოპულარობა მოიპოვა. ვინ წარმოიდგენდა, რომ ამბავი პაწაწინა ცელქ ბავშებზე მთელი მსოფლიოს ბავშვებისა და მათი მშობლების ერთ-ერთი უსაყვარლესი შოუ გახდებოდა? სერიალი არამარტო დიდხანს გაგრძელდა, არამედ სამ ფილმად, სპინოფ სერიალად და სახლის ვიდეოსერიებად გამოვიდა. 2012 წლამდე ის სპანჯბობის შემდეგ ყველაზე ხანგრძლივი საეთერო დროის მქონე მულტსერიალი იყო ნიკელოდეონზე.

10. სპანჯბობი – კვადრატული შარვალი

ჩვენ ყველამ ვიცით პასუხი კითხვაზე “ვინ ცხოვრობს ანანასში წყალქვეშ?”– დღეს უკვე საკულტოდ ქცეული, მრავალი პრესტიჟული ჯილდოს მფლობელი მულტსერიალის ლეგენდარული გმირი, ყვითელი ზღვის ღრუბელი, რომელმაც თავდაყირა დააყენა ყველას წარმოდგენები წყალქვეშა სამყაროს შესახებ.

მისი შემქმნელი სტივენ ჰილენბურგი წყალქვეშა ბიოლოგი იყო. იგი ათი წლის განმავლობაში ამუშავებდა სპანჯბობის იდეას, თავისი სამაგისტრო ნაშრომი კი – დოკუმენტური ფილმი ფარდობითობის თეორიის შესახებ კალიფორნიის ხელოვნების ინსტიტუტში წარადგინა. კიდევ ერთი ბონუს ფაქტი: სპანჯბობი და დანარჩენი გუნდი, რომლებიც ბიკინი ბოტომის ანთროპომორფულ ზღვის ქმნილებებს წარმოადგენენ, სინამდვილეში მარშალის კუნძულების წყალქვეშა ბიომრავალფეროვან სამყაროს მიხედვით არიან შექმნილები. სპანჯბობი დღემდე წარმატებით გადის ნიკელოდეონის არხზე.

11. ჰეი, არნოლდ!

არნოლდის, მისი მეგობრებისა და ოჯახის საინტერესო თავგადასავლები არხზე 1996-2004 წლებში გავიდა და მთლიანობაში 100 ეპიზოდს მოიცავს. არნოდლის მოკრძალებული წარსული გვიან 80-იანებში უნდა ვეძებოთ, როცა სამი მოკლე ფილმი გამოვიდა სახელწოდებით: არნოლდი ეკლესიიდან გარბის, არნოლდის ვალსი და არნოლდი სკამს დააჭენებს. 2017 წელს ნიკელოდეონმა ფილმის რებუთი გამოუშვა სახელით – ჰეი არნოლდ: ჯუნგლების ისტორია, რომელშიც 2004 წლის სერიებში განვითარებული სიუჟეტი გააგრძელა.

12. Rocko’s Modern Life (როკოს თანამედროვე ცხოვრება)

დარწმუნებულები ვართ, ფილმის სათაური ბევრმა თქვენგანმა ამ მულტფილმის თემის სიმღერაში წარმოთქმული სიტყვების ინტონაციით წაიკითხა. როკო ავსტრალიელი კენგურუა, რომელსაც საკუთარი ძაღლი ჰყავს და სატელეფონო ოპერატორად მუშაობს. როკოს თანამედროვე ცხოვრების მთავარი გამხმოვანებელი ნიკელოდეონის “ცნობილი ხმა გახლავთ”: ადამიანი, რომელიც ჩვენს ფავორიტ წყალქვეშა ანანასში მცხოვრებ ღრუბელს ახმოვანებს – ტომ კენი (სხვათა შორის, ის ასევე ახმოვანებს ძაღლს ზემოხსენებული კატაძაღლიდან). თავად როკოს ხმა კი კარლოს ალაზრაკის, ნიკელოდეონის კიდევ ერთ ცნობილ მსახიობს ეკუთვნის.